Түркия президенті Реджеп Тайып Ердоған ең төменгі зейнеткерлік жасын жойды. Бұл 2 миллионнан астам жұмысшының зейнетке шығуына мүмкіндік берді, деп хабарлайды Hürriyet газеті.
Түркия тұрғындары бірнеше жыл бойы ең төменгі зейнеткерлік жасқа наразылық білдірді. Олар оның орнына зейнетке шығу үшін міндетті жұмыс күндерін өткізуге мүмкіндік беруді талап етті. Бұрын зейнеткерлік жас әйелдер үшін 58 жаста, ал ерлер үшін 60 жаста болатын, деп хабарлайды Reuters.
Өткен аптада Ердоған бақылайтын басқарушы "Әділет және даму партиясы" инфляцияны тұрақтандыру, лира бағытын сақтау және халықтың жалпы өмір сүру деңгейін көтеру науқаны аясында ең төменгі жалақыны айтарлықтай арттырды. 2023 жылдан бастап Түркияда ең төменгі жалақы айына 8500 лираға (шамамен 210 мың теңге) дейін өсуі тиіс. 2022 жылы "минималка" мөлшері 4253 лираны (шамамен 105 мың теңге) құрады.
Ең төменгі зейнеткерлік жасты алып тастау туралы шешім Реджеп Тайып Ердоғанның 2023 жылдың 18 маусымында бір күнде өтетін Түркиядағы президенттік және парламенттік сайлауға дайындығының бір бөлігі болуы мүмкін.
Сурет: inbusiness.kz
