Биыл Ақтөбе қаласында өткен жаратылыстану-математикалық бағытындағы конкурстың қорытынды кезеңінде қазылар алқасының назарына 433 ғылыми жоба ұсынылып, 577 оқушы өз зерттеу жұмыстарын қорғаған.
Жер және ғарыш туралы ғылым секциясы бойынша 11-сынып оқушылары Ақылжан Ахметқали мен Айқын Булегенов геостационарлы орбитадағы ғарыштық қоқысты тазалайтын «Orbital Guardian» инновациялық құрылғысын ұсынды. Ғылыми туынды аэрогельмен қапталған иондық қозғалтқыш пен арнайы ұстап алу қапшықтары арқылы орбитаны кез келген мөлшердегі қоқыстан тазартуға мүмкіндік береді.
Құрылғыдағы жұлдызды датчиктер қоқысты анықтап, иондық тартқыш көмегімен қайта өңдеу орындарына тасымалдайды. Жоба аясында құрылғының макеті жасалып, мектеп жағдайында иондық қозғалтқышты сынақтан өткіздік. Қоқысты жинау үшін YOLO нейрожелісін қолданатын бағдарлама жасадық, - дейді зерттеу жұмысы жайлы ақпаратпен бөліскен жас өнертапқыштар.
Келесі қолданбалы математика секциясы бойынша Ерасыл Базарбаев мектеп оқушыларына математика пәнін жеңіл үйрету мақсатында «math12.studio» онлайн білім беру платформасын әзірлеген. 11-сынып оқушысының айтуынша, бүгінде 9 000 пайдаланушысы бар платформа тапсырмаларды жылдам шешуге, пән бойынша білімдерін тереңдетуге жол ашады.
Аспан мен математика әлеміне қызығушылығы мол жас зерттеушілерімізді жарысқа Анар Таяпбергенова, Нұрғазы Тұрсынғазин, Азиза Ахтанбердина есімді ұстаздар даярлаған.
