- Абайдың 175 жылдығы аясындағы шаралар әлі де жалғасуда. Оның себебі – ақын шығармашылығының өміршеңдігі. Ғұламаның ойлы өсиеттері мен даналық сөздері қай заманның болмасын, қажетіне жараған. Бүгінгі онлайн танымдық кешімізде біз осыны басшылыққа алып, шараға қатысуға ниет білдірген әр адамды тағы бір мәрте Абай атамызбен қауыштырғандай күй кештік. Кешке шәкірттерімізден бөлек, мектеп ұстаздары мен ата-аналардың қатысуы тіптен керемет болды, -дейді кешті ұйымдастырушы Мұхамед Жеңісұлы.
Кеш барысына қатысушылар Абай мұражайына онлайн-саяхат жасап, Абай атындағы кітапханадан әзірленген “Абай әлемі” кітап көрмесін тамашалады. Сондай-ақ, ғалым А. Омаровпен онлайн дидарласып, дала данасының ғибратты өмірі, шығармашылығы жайлы салиқалы әңгімеге құлақ түрді. Оқушылар өздерін толғандырған сауалдарына жауап алды.
- Бүгінгі шараға шақырып, зияткер оқушылармен қашықтан болса да жүздескеніме қуаныштымын. Әсіресе, жас буынның Абай атамызды жаңа қырынан танығысы келгендері мені қатты қуантты. Қызыққан, білгісі келген жайлары да ойланып жауап беруге тұрарлық сұрақтар. Соған байланысты өз тарапымнан Абайдың тәрбие, имандылық философиялары жайлы айтқандарын ортаға салдым. Олардың барлығы жастарымыздың келешек өміріне пайдасын тигізеріне күмән жоқ, - дейді кеш қонағы Асан Омаров.
Кеш барысында мектебіміздің талантты оқушыларының бірі Шыңғыс Тоқанов ойшылдың қара сөздерін оқып, өзге қатысушылармен кері байланыс орнатылды. Бұл сәтте қатысушылар Абайға қатысты түрлі сауалдарға жауап беріп, өз білімдерін сынап көрді.
