2023 жылғы 1 қаңтардан бастап Қазақстанда 4,4 млн алушы үшін зейнетақылар мен жәрдемақылардың барлық түрлерінің мөлшері ұлғайтылды. Бұл мақсаттарға республикалық бюджетте 4,6 трлн теңге қарастырылған.
Базалық зейнетақының мөлшері ең төменгі күнкөріс деңгейінің жыл сайынғы ұлғаюын ескере отырып, сондай-ақ Мемлекет басшысының тапсырмасына сәйкес оның ең төменгі мөлшерінің ең төменгі күнкөріс деңгейінің 54% - дан 60% - ға дейін ұлғаюына байланысты арттырылды;
Ынтымақты зейнетақы мөлшері инфляция деңгейінен 2% - ға озып көтерілді. Бұдан басқа, Мемлекет басшысының тапсырмасына сәйкес ынтымақты зейнетақыны есептеу үшін пайдаланылатын ең жоғары табыс мөлшері 46-дан 55 АЕК-ке дейін (158,7-ден 189,8 мың теңгеге дейін) ұлғайтылды.
"Нәтижесінде бюджеттен төленетін зейнетақы төлемдерінің ең төменгі мөлшері 68,2 мың теңгеден 77,4 мың теңгеге дейін өсті. Зейнетақының өсуі барлық 2,2 млн зейнеткерге әсер етті", - деп хабарлады ҚР ЕХӘҚМ баспасөз қызметі.
Ең төменгі күнкөріс деңгейінің ұлғаюына байланысты мүгедектік және асыраушысынан айрылу жағдайы бойынша жәрдемақылардың мөлшері де артты. Айлық есептік көрсеткіш (АЕК) мөлшерінің ұлғаюына сәйкес тағы да бірқатар жәрдемақылардың мөлшері ұлғайтылды.
Жұмыс істейтін және жұмыс істемейтін әйелдерге төленетін бала тууға мемлекеттік қолдаудың мөлшері қазір мыналарды құрайды:
бірінші, екінші және үшінші балаға 38 АЕК немесе 131 100 теңге (2022 жылы - 120 840 теңге);
төртінші балаға және одан да көп - 63 АЕК немесе 217 350 теңге (2022 жылы - 200 340 теңге).
Сонымен қатар, республикалық бюджеттен жұмыс істемейтін ата-аналарға бала күтімі бойынша жәрдемақы тағайындалады, оның мөлшері АЕК-тің өсуін ескере отырып, осы жылдан бастап 8,5% - ға өсті.
"Жұмыс істейтін ата-аналар бала күтімі бойынша әлеуметтік төлемдерді Мемлекеттік әлеуметтік сақтандыру қорынан алады. Осы жылдан бастап Президенттің тапсырмасы бойынша бала күтімі бойынша төлем мерзімі бір жылдан бір жарым жылға дейін ұлғайтылды", - деп нақтылады ҚР ЕХӘҚМ баспасөз қызметі.
Атап өтілгендей, Қазақстанда мүгедек балаларды қолдау үшін кәмелетке толғанға дейін Арнайы мемлекеттік жәрдемақы төленеді. Оның мөлшері 2023 жылы 56 794 теңгені (бұрын 52 345 теңге) құрайды.
Жаңа жылда көпбалалы отбасыларға арналған жәрдемақы мөлшері АЕК өсімін ескере отырып өсті:
4 баласы бар отбасыларға ай сайын 55 304 теңге (бұрын 50 976 теңге) төленетін болады;
5 баламен - 69 138 теңге (бұрын 63 728 теңге);
6 баламен - 82 973 теңге (бұрын 76 479 теңге);
7 баламен - 96 807 теңге (бұрын 89 231 теңге);
әрбір 8-ші және одан кейінгі балаға - 13 800 теңгеден (бұрын 12 720 теңгеден).
