- Мопедті басқару үшін енді бірнеше талаптар бекітілді. Көлік мемлекеттік тіркеуден өткізіліп, техникалық байқаудан өтуі, сақтандыру полисі рәсімделуі және жүргізушінің А, А1 немесе В санатындағы куәлігі болуы қажет. Тіркеу үшін азаматтар тұрғылықты жері бойынша арнайы ХҚКО-ға барып, жеке куәлігі мен мопедтің техникалық құжатын (немесе сипаттамасын) ұсынуы тиіс. Сонымен қатар көлік тексеруден өтіп, мемлекеттік баж салығын төлеуі қажет, - деп атап өтті спикер.
Сондай-ақ, облыс бойынша бүгінде 1017 мопед тіркелген, оның ішінде ең көбі Семей қаласында (545) және Үржар ауданында (92). 2024 жылдың 5 сәуірінен бері 156 мопед жүргізушісі әкімшілік жауапкершілікке тартылған, 49-ы мас күйде, 66-сы жүргізу куәлігінсіз көлік басқарған. Сонымен қатар, 6 адам сақтандырусыз, 4 адам техникалық байқаудан өтпей жүргені үшін жауапқа тартылды. Мопед қатысқан бір жол апаты тіркеліп, 2 адам жарақат алған.
